ਨਵੀਂ ਦਿੱਲੀ, 07 ਅਪ੍ਰੈਲ 2023- ਦੇਸੀ ਗਰਲ ਪ੍ਰਿਅੰਕਾ ਚੋਪੜਾ ਇਨ੍ਹੀਂ ਦਿਨੀਂ ਭਾਰਤ ਆਈ ਹੋਈ ਹੈ। ਅਦਾਕਾਰਾ ਨੂੰ ਹਾਲ ਹੀ ਵਿਚ ਨੀਤਾ ਮੁਕੇਸ਼ ਅੰਬਾਨੀ ਕਲਚਰਲ ਸੈਂਟਰ ਦੇ ਉਦਘਾਟਨ ਸਮਾਰੋਹ ਵਿਚ ਦੇਖਿਆ ਗਿਆ ਸੀ। ਜਿੱਥੇ ਉਸ ਨੇ ਆਪਣੀ ਵੱਖਰੀ ਲੁੱਕ ਤੇ ਖੂਬਸੂਰਤੀ ਕਾਰਨ ਸਭ ਦਾ ਧਿਆਨ ਆਪਣੇ ਵੱਲ ਖਿੱਚ ਲਿਆ ਸੀ।
ਬੇਟੀ ਨਾਲ ਸਿੱਧੀਵਿਨਾਇਕ ਮੰਦਰ ਪਹੁੰਚੀ ਪ੍ਰਿਅੰਕਾ
ਬਾਲੀਵੁੱਡ ਅਭਿਨੇਤਰੀ ਤੋਂ ਗਲੋਬਲ ਸਟਾਰ ਬਣ ਚੁੱਕੀ ਪ੍ਰਿਅੰਕਾ ਚੋਪੜਾ ਬੀਤੇ ਦਿਨ ਮੁੰਬਈ ਦੇ ਸਿੱਧੀਵਿਨਾਇਕ ਮੰਦਰ ਪਹੁੰਚੀ। ਇੱਥੇ ਅਦਾਕਾਰਾ ਦੇ ਨਾਲ ਉਸ ਦੀ ਨੰਨ੍ਹੀ ਪਰੀ ਮਾਲਤੀ ਮੈਰੀ ਵੀ ਸੀ। ਪ੍ਰਿਅੰਕਾ ਨੇ ਮਾਲਤੀ ਨੂੰ ਆਪਣੀ ਗੋਦ ਵਿੱਚ ਲੈ ਕੇ ਭਗਵਾਨ ਦੇ ਦਰਸ਼ਨ ਕੀਤੇ। ਦੋਵਾਂ ਦਾ ਸਿੱਧਾਵਿਨਾਇਕ ਦਾ ਵੀਡੀਓ ਕੁਝ ਹੀ ਮਿੰਟਾਂ ‘ਚ ਸੋਸ਼ਲ ਮੀਡੀਆ ‘ਤੇ ਵਾਇਰਲ ਹੋ ਗਿਆ। ਹਾਲਾਂਕਿ ਹੁਣ ਵੀਡੀਓ ਨੂੰ ਲੈ ਕੇ ਟ੍ਰੋਲਿੰਗ ਕੀਤੀ ਜਾ ਰਹੀ ਹੈ।
ਵਾਇਰਲ ਵੀਡੀਓ
ਸੋਸ਼ਲ ਮੀਡੀਆ ‘ਤੇ ਵਾਇਰਲ ਵੀਡੀਓ ‘ਚ ਪ੍ਰਿਅੰਕਾ ਚੋਪੜਾ ਆਪਣੀ ਬੇਟੀ ਨੂੰ ਗੋਦ ‘ਚ ਲੈ ਕੇ ਮੰਦਰ ਦੇ ਬਿਲਕੁਲ ਸਾਹਮਣੇ ਬੈਠੀ ਨਜ਼ਰ ਆ ਰਹੀ ਹੈ। ਇਸ ਦੌਰਾਨ ਪੰਡਿਤ ਆ ਕੇ ਉਸ ਨੂੰ ਅਤੇ ਮਾਲਤੀ ਨੂੰ ਟਿੱਕਾ ਦਿੰਦੇ ਹਨ। ਇਸ ਤੋਂ ਬਾਅਦ ਉਹ ਅਭਿਨੇਤਰੀ ਦੇ ਨਾਲ ਆਏ ਕੁਝ ਹੋਰ ਲੋਕਾਂ ਦੇ ਮੱਥੇ ‘ਤੇ ਤਿਲਕ ਲਾਉਂਦੇ ਹਨ।
ਵੀਡੀਓ ਬਣਾਉਣ ‘ਤੇ ਭੜਕੇ ਲੋਕ
ਪ੍ਰਿਅੰਕਾ ਦੇ ਨਾਲ ਆਏ ਲੋਕਾਂ ਨੇ ਇਸ ਪੂਰੇ ਦ੍ਰਿਸ਼ ਦੀ ਵੀਡੀਓ ਵੀ ਬਣਾਈ ਜੋ ਕਿ ਸਿੱਧੀਵਿਨਾਇਕ ਮੰਦਰ ਦੇ ਨਿਯਮਾਂ ਦੇ ਖਿਲਾਫ ਹੈ। ਇਸ ਕਾਰਨ ਲੋਕ ਪ੍ਰਿਅੰਕਾ ਤੇ ਮੰਦਰ ਦੇ ਪ੍ਰਬੰਧਕਾਂ ਨੂੰ ਬੁਰੀ ਤਰ੍ਹਾਂ ਨਾਲ ਟ੍ਰੋਲ ਕਰ ਰਹੇ ਹਨ।
