ਨਵੀਂ ਦਿੱਲੀ, 9 ਮਈ 2023 – ਪਿਛਲੇ ਕੁਝ ਮਹੀਨਿਆਂ ਤੋਂ ਆਪਣੇ ਰਿਸ਼ਤੇ ਨੂੰ ਲੈ ਕੇ ਸੁਰਖੀਆਂ ‘ਚ ਚੱਲ ਰਹੇ ਆਮ ਆਦਮੀ ਪਾਰਟੀ ਦੇ ਰਾਜ ਸਭਾ ਮੈਂਬਰ ਰਾਘਵ ਚੱਢਾ ਅਤੇ ਅਦਾਕਾਰਾ ਪਰਿਣੀਤੀ ਚੋਪੜਾ ਦੀ ਮੰਗਣੀ ਦੀ ਤਰੀਕ ਤੈਅ ਹੋ ਗਈ ਹੈ। ਦੋਵੇਂ ਇਸੇ ਮਹੀਨੇ 13 ਮਈ ਨੂੰ ਮੰਗਣੀ ਕਰਨ ਜਾ ਰਹੇ ਹਨ। ਇਸ ਦੀ ਪੁਸ਼ਟੀ ਆਮ ਆਦਮੀ ਪਾਰਟੀ ਵੱਲੋਂ ਕੀਤੀ ਗਈ ਹੈ। ਹਾਲਾਂਕਿ ਜਦੋਂ ਵੀ ਦੋਹਾਂ ਤੋਂ ਪੁੱਛਿਆ ਗਿਆ ਤਾਂ ਦੋਹਾਂ ਨੇ ਇਨ੍ਹਾਂ ਖਬਰਾਂ ਦਾ ਖੰਡਨ ਕੀਤਾ।
ਇਨ੍ਹਾਂ ਦੋਵਾਂ ਦੀ ਡੇਟਿੰਗ ਦੀ ਖਬਰ ਪਹਿਲੀ ਵਾਰ ਮਾਰਚ ਮਹੀਨੇ ਸਾਹਮਣੇ ਆਈ ਸੀ ਜਦੋਂ ਦੋਵੇਂ ਇੱਕੋ ਰੈਸਟੋਰੈਂਟ ‘ਚ ਇਕੱਠੇ ਨਜ਼ਰ ਆਏ ਸਨ। ਇਸ ਤੋਂ ਬਾਅਦ ਦੋਵਾਂ ਨੂੰ ਦਿੱਲੀ-ਮੁੰਬਈ ‘ਚ ਕਈ ਥਾਵਾਂ ‘ਤੇ ਇਕੱਠੇ ਦੇਖਿਆ ਗਿਆ।
ਇੱਥੋਂ ਤਕ ਕਿ ਚੇਅਰਮੈਨ ਜਗਦੀਪ ਧਨਖੜ ਨੇ ਰਾਜ ਸਭਾ ਦੇ ਅੰਦਰ ਰਾਘਵ ਚੱਢਾ ਨੂੰ ਛੇੜਿਆ ਸੀ। ਨਿਊਜ਼ ਏਜੰਸੀ ਏਐਨਆਈ ਦੇ ਰਿਪੋਰਟਰ ਨੇ ਜਦੋਂ ਰਾਘਵ ਤੋਂ ਸੰਸਦ ਦੇ ਬਾਹਰ ਉਨ੍ਹਾਂ ਦੇ ਅਤੇ ਪਰਿਣੀਤੀ ਦੇ ਵਿਆਹ ਬਾਰੇ ਸਵਾਲ ਕੀਤਾ ਸੀ ਤਾਂ ਰਾਘਵ ਨੇ ਮੁਸਕਰਾਉਂਦੇ ਹੋਏ ਕਿਹਾ ਸੀ ਕਿ ਤੁਸੀਂ ਮੈਨੂੰ ‘ਰਾਜਨੀਤੀ’ ‘ਤੇ ਸਵਾਲ ਕਰਦੇ ਹੋ ਨਾ ਕਿ ‘ਪਰਿਣੀਤੀ’ ‘ਤੇ।
ਦੂਜੇ ਪਾਸੇ ਇਕ ‘ਆਪ’ ਵਿਧਾਇਕ ਨੇ ਪਿਛਲੇ ਮਹੀਨੇ ਰਾਘਵ ਅਤੇ ਪਰਿਣੀਤੀ ਨੂੰ ਉਨ੍ਹਾਂ ਦੇ ਰਿਸ਼ਤੇ ਲਈ ਵਧਾਈ ਦਿੱਤੀ ਸੀ। ਇਨ੍ਹਾਂ ਦੀ ਜੋੜੀ ਨੂੰ ਸੋਸ਼ਲ ਮੀਡੀਆ ‘ਤੇ ‘ਰਾਗਨੀਤੀ’ ਦਾ ਨਾਂ ਮਿਲਿਆ ਹੋਇਆ ਹੈ।
