ਪਟਿਆਲਾ, 16 ਦਸੰਬਰ 2023 – ਪਟਿਆਲਾ ਸੀਆਈਏ ਸਟਾਫ ਵਲੋਂ ਇਕ ਗੈਂਗਸਟਰ ਨੂੰ ਮੁਕਾਬਲੇ ਦੌਰਾਨ ਕਾਬੂ ਕਰਨ ਦਾ ਦਾਅਵਾ ਕੀਤਾ ਗਿਆ ਹੈ ਜਿਸਦੀ ਪਛਾਣ ਮਲਕੀਤ ਸਿੰਘ ਉਰਫ ਚਿੱਟਾ ਵਜੋਂ ਹੋਈ ਹੈ। ਉਸਦੀ ਸੱਜੀ ਲੱਤ ‘ਚ ਗੋਲ਼ੀ ਲੱਗੀ ਹੈ ਤੇ ਇਲਾਜ ਲਈ ਸਰਕਾਰੀ ਹਸਪਤਾਲ ‘ਚ ਦਾਖਲ ਕਰਵਾਇਆ ਗਿਆ ਹੈ।
ਐੱਸਐੱਸਪੀ ਵਰੁਣ ਸ਼ਰਮਾ ਨੇ ਦੱਸਿਆ ਕਿ ਸੀ ਆਈ ਏ ਸਟਾਫ ਮੁਖੀ ਇੰਸਪੈਕਟਰ ਸ਼ਮਿੰਦਰ ਸਿੰਘ ਦੀ ਅਗਵਾਈ ਵਾਲੀ ਟੀਮ ਮਲਕੀਤ ਸਿੰਘ ਉਰਫ ਚਿੱਟਾ ਨੂੰ ਪਿੰਡ ਖੇੜਾ ਜੱਟਾਂ ਨੇੜੇ ਘੇਰਾ ਪਾਇਆ ਸੀ। ਮਲਕੀਤ ਨੇ ਆਪਣੇ ਆਪ ਨੂੰ ਫੜਿਆ ਜਾਂਦਾ ਦੇਖ ਪੁਲਸ ਟੀਮ ‘ਤੇ ਗੋਲੀਆਂ ਚਲਾਈਆਂ। ਜਿਸਦੇ ਵਾਂ ‘ਚ ਪੁਲਿਸ ਵੱਲੋਂ ਫਾਇਰਿੰਗ ਕੀਤੀ ਗਈ। ਇਸ ਮੁਕਾਬਲੇ ‘ਚ ਇਕ ਗੋਲੀ ਚਿੱਟਾ ਦੀ ਲੱਤ ‘ਚ ਲੱਗੀ ਤੇ ਉਸਨੂੰ ਕਾਬੂ ਕਰ ਲਿਆ ਗਿਆ। ਮਲਕੀਤ ਕੋਲੋਂ 32 ਬੋਰ ਪਿਸਤੌਲ ਬਰਾਮਦ ਹੋਇਆ। ਜਿਸ ਸਬੰਧੀ ਥਾਣਾ ਪਸਿਆਣਾ ਵਿਖੇ ਮਾਮਲਾ ਦਰਜ ਕੀਤਾ ਗਿਆ ਹੈ।
ਐੱਸਐੱਸਪੀ ਅਨੁਸਾਰ, ਮਲਕੀਤ ਸਿੰਘ ਉਰਫ ਚਿੱਟਾ ਖਿਲਾਫ ਕਤਲ, ਇਰਾਦਾ ਕਤਲ, ਲੁੱਟ ਖੋਹ ਆਦਿ ਦੇ ਮਾਮਲੇ ਦਰਜ ਹਨ। ਜੋ ਜੇਲ੍ਹ ਵੀ ਜਾ ਚੁੱਕਿਆ ਹੈ। ਜੇਲ੍ਹ ‘ਚੋਂ ਬਾਹਰ ਆ ਕੇ ਮਲਕੀਤ ਨੇ ਆਪਣੇ ਸਾਥੀਆਂ ਨਾਲ ਮਿਲ ਕੇ ਮਈ ਮਹੀਨੇ ਵਿੱਚ ਤ੍ਰਿਪੜੀ ਇਲਾਕੇ ਦੇ ਇਕ ਸੈਲੂਨ ਮਾਲਕ ਗੁਰਪ੍ਰੀਤ ਉਰਫ ਮੋਨੂੰ ਦੇ ਕਤਲ ਨੂੰ ਅੰਜਾਮ ਦਿੱਤਾ ਸੀ। ਉਸ ਤੋਂ ਬਾਅਦ ਇਹ ਭਗੌੜਾ ਚੱਲ ਰਿਹਾ ਸੀ। ਐੱਸਐੱਸਪੀ ਅਨੁਸਾਰ ਮਲਕੀਤ ਦੇ ਹੋਰ ਗੈਂਗਸਟਰ ਨਾਲ ਵੀ ਸਬੰਧ ਹੋਣੇ ਪਾਏ ਗਏ ਹਨ। ਮਲਕੀਤ (22) ਖ਼ਿਲਾਫ਼ ਪਟਿਆਲਾ ਦੇ ਥਾਣਾ ਤ੍ਰਿਪੜੀ ਵਿਚ ਇਕ ਕਤਲ, ਇਕ ਇਰਾਦਾ ਕਤਲ ਤੇ 6 ਹੋਰ ਲੁੱਟਾਂ ਖੋਹਾਂ ਦੀਆਂ ਵਾਰਦਾਤਾਂ ਦੇ ਮਾਮਲੇ ਦਰਜ ਹਨ।
